DOS DO JOLMA DI DEBATA

Tu hamu na dongan sahaporseaon renungan sahalion marbahasa batak,,,,,

DOS DO JOLMA DI DEBATA

Ulaon ni Apostel 10:28-34

Ise do si Kornelius na nidok na di turpuk on, ima: sahalak Letnan, masuk horong Italia. Sahalak na daulat jala mangkabiari Debata rap dohot sandok isi ni bagasna. Godang do asiasina diparlehon tu bangso Jahudi, jala ondop do ibana martangiang tu Debata. Sandok na uli do baritana di saluhut halak Jahudi.

Tu si Kornelius on do ro si Simon Petrus pasahathon Barita Nauli dung disuru Tondi ni Debata ibana. Sian on ma botoonta, na so siida boho hape Debata. Na so marpili Debata tu angka na olo manjalo haluaonNa. Dos do jolma i di adopan ni Debata.

1. Diajari Debata do si Petrus mandok na so marrimbar jolma di jolo ni Debata.

Tangkas do i idaonta sian pandohan ni si Petrus: ‘…na so jadi goaron jolma dia pe ramun manang so ias.” Mula na i, lohot do pe dipangantusion ni si Petrus sisubangkononhon do marsaor dohot bangso na asing manang bangso sileban. Pantang do molo marsaor halak Jahudi dohot halak na so Jahudi. Alai, dung ditorangi Tondi ni Debata ibana di na martangiang i di bagas ni si Simon sipauli hulingkuling (Tajaha di bindu 10:9-15), dung i pe muba ma pangantusionna, torang ma rohana na so marimbar jolma sian bangso dia pe di jolo ni Debata. Na so si ida bangso hape Debata. Ndada holan halak Jahudi sambing na umboto subang on, alai bangso na so Jahudi pe, ima si Kornelius halak Italia i, diongkuhon ibana do pandohan i, sisubangkononhon do nasida maradophon halak Jahudi.

Diajari Tondi ni Debata do si Petrus mananda ulaon hatuaon ni Debata, ima ingkon malua saluhut jolma sian bangso dia pe. Marhite Tondi i dipaimbaru do pangantusion ni si Petrus taringot tu hajongjongan ni sude bangso di jolo ni Debata. Sian on ma tubu ma di pingkiran dohot di roha ni si Petrus laho borhat pasahathon Barita Nauli on tu sandok bangso, asa saut malua sude jolma sian houm dohot bangso dia pe.

Diajari Hata ni Debata do hita, asa pasidingkon pangantusion na pejet marnida halak na asing i, na so sahorong, na so sabangso dohot na so saugamo dohot hita halak na so niasian ni Debata. Ndang tama dohononta ramun halak na so sa horong dohot hita. Ndang sai dohononta be ndang dos hajolmaonta dohot halak na asing, bahkan pangantusion na mandok api naroko na ma jambar ni halak na so sahorong dohot hita. Ingkon denggan do parsaoranta tu sude jolma. Unang ala ni marimbar parhataan, bangso, suku, ugamo dohot warna kulit gabe so marsiantoan, masipangkulingan, ndang masijangkonan, sai masipasidingan hita. Unang ala so saugamo hita, gabe so boi rap hundul, rap mengkel, rap tangis, rap marnonang/marsarita, rap masilehonan pingkiran na denggan jala rap patupahon angka na denggan di parsaoran songon jolma na rap tinompa ni Debata. Bahkan sai ro do pangunjunan tu hita, so marsiantoan pe ndang pola boha, ala so saugamo, jala pangkilalaan hira na so sala pemahaman i. Jadi, dos do jolma i di jolo ni Debata.

Marhite on ma gabe lam bidang dalan laho pasahathon Barita Haluaon i tu sude jolma. Alai, molo tadok do ramun halak na so sahorong dohot hita, laos alani i gabe ndang olo hita marsaor, laos i do mangambati hita pasahathon Barita Haluaon na binoan ni Tuhan Jesus. Di pangantusion on do na nidok na, ndang marimbar sude jolma, rap ingkon dapotan haluaon dohot asi ni roha ni Debata do. Ansugari, ndang ditorangi jala ndang diajari Tondi i si Petrus, tung so ungkap do rohana marbarita nauli tu bangso na asing. Alai, dung dibohali Debata ibana, taringot tu si, ipe asa borhat ibana mangoloi gokhon dohot joujou ni si Kornelius asa bongot tu jabuna rap dohot keluargana. Dia do na taida disi, malua sajabu, ala Barita Nauli na binoan ni si Petrus. Taloas ma dirinta torangan jala ajaran ni Tondi ni Debata, asa gotap angka hasomalan dohot ruhutruhut na mangihot hita di pangantusion na pejet (dangkal) taringot tu holong ni Debata. Di barita ni si Petrus dohot Kornelius on, hasomalan dohot ruhutruhut na manirang parsaoran ni Jahudi dohot na so Jahudi nunga gotap.

2. Diajari Tondi ni Debata do si Kornelius mananda dalan haluaon i.

Tangkas dipatorang di turpuk on, haradeon ni si Kornelius manjou si Petrus tu bagasna ima dung pe ditorangi jala diajari Tondi ni Debata ibana. Hirahira di pungkul tolu arian na i torang ma diida di bagasan tondina, ro surusuruan ni Debata manopot ibana, laos dijouhon goarna. Alai marnida i ibana, biar ma rohana, huhut ma didok: Ai aha, Tuhan? Gabe ninna ma: Nunga sahat tu parningotan di jolo ni Debata angka tangiangmi ro di angka asiasimi (10:3-4). Halak na marhabiaran tu Debata do si Kornelius. Keluargana pe halak na daulat marroha, burju marsilehonlehon jala ringgas martangiang.

Ndang hapingkiran jala ndang habilangan dalan ni Debata pasauthon haluaonNa tu sandok bangso. Digurtuk Debata do sandok halak na marhabiaran tu Debata marhite TondiNa asa ditanda dalan haluaon i. Marhite TondiNa i, diajari Debata do si Kornelius ise na naeng dapothononna asa taruli ibana di barita haluaon i. Dipatongon Tondi i do tu si Kornelius sahalak naposo ni Debata ima si Petrus. Marhite si Petrus lam tangkas ma didai jala dihangoluhon si Kornelius dohot keluargana holong na sian Debata, na so siida bohi Debata.

Di na ungkap si Kornelius manangihon Tondi ni Debata jala pasauthonsa dapotan haluaon do ibana marhite Barita Nauli na sian Debata na pinasahat ni si Petrus. Ndada holan i taruli do si Kornelius dohot keluargana manjalo pandidion sian si Petrus, songon tanda naung manjalo haluaon sian Debata.

3. Ndang siida bohi Debatanta.

On do kesimpulan ni si Petrus diparjumpanganna dohot si Kornelius: Na so siida bohi Debata! Molo didok ndang siida bohi Debata, ndang laos dohononta holan siida roha do Debata. Alai, na sintong siida saluhut do Debata. Diida do hataridaan parduru, alai laos diida do hadirionta parbagasan. Hadomuanna dison, na so holan sada bangso ni asian ni Debata, alai sandok bangso do na mangkabiari Ibana. Tegas do pingkiran on dipeop si Paulus: ‘Ai ndang adong imbar ni Jahudi manang Junani; ai Sada do Tuhan ni saluhutna, naung marbasabasahon sian hamoraonna tu saluhut angka na manjou Ibana’ (Rom. 10:12). Jala didiok ibana do muse marhite pandohan retorik: ‘Ai holan Jahudi do nampuna Debata? Nda dohot sipelebegu i? I do antong; dohot do sipelebegu i! (Rom 3:29). Tuhan ido Debata na rade mangalehon haluaon tu sandok bangso tu angka na olo manangihon Ibana jala pasauthon parentana, ima songon na taida di hadirion ni si Kornelius, na pintor hatop manggohi na nidok ni Debata tu ibana. Jahowa Debata, ido Debata partigor na so marnida bohi pasahathon asi ni rohaNa. Ibana do Debata ni angka debata, jala Tuhan ni angka tuan, Ibana Debata na sun timbul, na sun gogo jala na songkal sahali, na so marnidanida bohi jala na so olo manjalo silua (5 Musa 10:17).

Ndang holan hataridaan parduru na niida ni Debata sian hita, alai tarlumobi rohanta dohot parsitutuonta mangoloi Ibana. Ndang tagonan idaon ni Tuhanta hita badia sian duru alai, ramun dibagasanna. Songon halak parise na pininsang ni Tuhan Jesus: ‘Marjea ma hamu sibotosurat dohot Parise, hamu pangansi! Ai suman do hamu tu tanoman na hinapur, angka na denggan berengon sian duru, hape marisi holiholi ni na mate do dohot nasa na rotak!’ (Mat. 23:27).

Mangula do Debata di diri ni angka halak na patupahon hasintongan dohot hatigoran di portibi on. Dipangke Debata do halak na burju mangulahon na denggan jala na daulat marroha jala na manghabiari ibana, laho patupahon hademahon tu saluhut jolma, so pola marnida latar belakang hajolmaonna. Boha do hita asa lam marsitutu pasauthon hata ni Debata dohot bulus ni roha. Jala marhite na siida bohi Debata, gabe lam bidang ma pangantusionta, na so dibatasi holan di huria i, Tondi ni Debata mangula, alai di balian ni huria pe tong do mangula tondi ni Debata.

Tuhan Yesus Ma namandongani hita ganup marsada.

Amin.